საქართველოს საზოგადოებრივი მაუწყებელი გაერთიანებული ოპოზიციის მიერ წარდგენილ პრეზიდენტობის კანდიდატს ლევან გაჩეჩილაძეს პირდაპირ ეთერს საინფორმაციო გამოშვება "მოამბეში, 20.00 საათზე წარუდგენს. ასეთი გადაწყვეტილება მიიღო ტელეარხის ხელმძღვანელობამ, იუწყება ტელეკომპანია "მზე". ამჟამად უცნობია, მიიღებს თუ არა ამ წინადადებას თვითონ ლევან გაჩეჩილაძე - ერთიანი ეროვნული საბჭო პირდაპირი ეთერის გამოყენების შესახებ გადაწყვეტილებას რამდენიმე საათის განმავლობაში მიიღებს.
ამ გადაწყვეტილებაზეა დამოკიდებული, გაგრძელდება თუ არა პრეზიდენტობის კანდიდატის მომხრეების საპროტესტო აქციები საზოგადოებრივი მაუწყებლის შენობის წინ.
გუშინ ლევან გაჩეჩილაძემ განაცხადა, რომ გაერთიანებული ოპოზიციის წარმომადგენლები საპროტესტო აქციებს "საზოგადოებრივი მაუწყებლის" შენობის წინ მანამ გააგრძელებენ, სანამ მათ პირდაპირი ეთერი არ წარედგინებათ.
"ხვალ, 14.00 საათზე ჩვენ შევიკრიბებით "საზოგადოებრივი მაუწყებლის" შენობის წინ და აქციას მანამ გავაგრძელებთ, სანამ საშუალებას არ მოგვცემენ, ამომრჩეველს მივმართოთ და არჩევნების გაყალბების შესახებ სიმართლე ვუთხრათ", - განაცხადა ლევან გაჩეჩილაძემ.
მან ასევე აღნიშნა, რომ ოთხშაბათს საღამოს ცნობილი გახდება, გაერთიანებული ოპოზიციის რომელი წარმომადგენელი, როდის და სად დაიწყებს შიმშილობას. გაერთიანებული ოპოზიცია ორ მოთხოვნას აყენებს: მათთვის პირდაპირი ეთერის შეთავაზებას და საპრეზიდენტო არჩევნების მეორე ტურის ჩატარებას.
13 იანვარს კოალიციაში გაერთიანებული ცხრა ოპოზიციური პარტიის წარმომადგენლები არჩევნების მეორე ტურის დანიშვნის მოთხოვნით რიყეზე მასშტაბური მიტინგის ჩატარებას აპირებენ.
შესაძლოა, გაერთიანებული ოპოზიციის მოწოდებას იმ ოპოზიციური პარტიების წარმომადგენლებიც შეუერთდნენ, რომლებიც კოალიციაში არ არიან გაერთიანებულები.
ცესკოს ოფიციალური მონაცემებით, ბიულეტენების 96%-ის დათვლის შემდეგ ამომრჩეველთა ხმები შემდეგნაირად გადანაწილდა - ლევან გაჩეჩილაძე - 25,3%, არკადი პატარკაციშვილი - 7%, დავით გამყრელიძე - 4%, შალვა ნათელაშვილი - 6,4%, მიხეილ სააკაშვილი - 52,2%, გიორგი მაისაშვილი - 0,8%, ირინა სარიშვილი - 0,2%. --0--
